ज्योती ज्योतींनी अंगण प्रकाशले

ज्योती ज्योतींनी अंगण प्रकाशले

   मनामनांचे अंतरंग तेजाने उजळले

   तमाचे भवताल भेदक शहारले

   हर्षोल्हासात सारे आसमंत झळाळले

   नात्यांच्या उत्सवाचे महत्त्व आगळे

   फराळ, फटाके, रांगोळ्या, आकाशदिवे

    जणू शुभ दीपावलीचे डोहाळे

   

    ......मृदुला.

          २९/१०/२०१९.

शक्ती आवाहन

     पळें जाती

    घटिका जाती

    घटा-घटांत घरोघरी 

    सुघट तव स्थापिती

     घटकांभर का होईना

    मनरमणी, तुज नमना

    भक्त सारे विसावती

      ये गं ये नवरात्री ये

       ये गं ये रेणुका ये

      ये गं ये जगदंबा ये

     नवचेतना तू , विघ्ननाशिनी

      नवदुर्गा तू , दुर्गतिनाशिनी

     आनंददायी तू , रातजागेश्वरी

     त्रिकालदर्शी तू , रक्षणकर्ती

    नवदिनांत तू , अखंडज्योति

      ये गं ये नवरात्री ये

       ये गं ये रेणुका ये

      ये गं ये जगदंबा ये

    स्त्री भृणहत्या, पीडित शोषण

      मुला-मुलींचे कुपोषण

     बाजारु झाले आज शिक्षण

    शुंभ-निशुंभ हे आजचे तू जाण

    घटना अशा ह्या कलियुगास...

       देती अवकळा

    कळानष्ट ह्या सृष्टीस, 

   नवरुपिणी तू दे नवकळा

      ये गं ये नवरात्री ये

       ये गं ये रेणुका ये

      ये गं ये जगदंबा ये

   नवरंगी पुष्पांच्या गुंफियेल्या माळा

   नव-वस्त्रें परिधान करता तुज

   सुंदरी रेणुके, सृष्टीत ह्या पसरती...

     चैतन्य झळा....

   नवविधा भक्तीत ये तू

  अंतर्मनी प्रकट होसी अमुच्या तू

    शक्तिस्वरुपे स्वबळा

   कामक्रोधादि षडरिपूंना जाळूनी 

     करु तुझी आरती

      ये गं ये नवरात्री ये

       ये गं ये रेणुका ये

      ये गं ये जगदंबा ये

  मृदुला मुकुंद पाटखेडकर.

स्कंदमाता

तूच असशी मनांत 

   तूच वसशी ओठांवरी

   ऐल तीरावरुन तुला

    पैलतीरी मी

   हाक देतसे काठावरी

   तूच असशी भाव माझा

   तूच असशी भावना

   तुझीच मन सदा करी आराधना 

    आदि न लागे

    अंत न लागे

  ठाव तुझा शोधू कुठवरी 

   कधी देशील मला तू साद

    साद मी दिली तरी

    देशील का प्रतिसाद??

   उत्त्तराची वाट पाहण्या मी आतुर

     भेट तू मला लवकरी

      विश्वाची माया तू

      कृपेची छाया तू

      भक्तांची माय तू

     नांदसी मम अंतरी

    

      कुष्मांडा तूच

      कात्यायनी तूच

      महाकाली तूच

      स्कंदमाता तूच

     दुर्गा, सरस्वती तूच

        तूच निलांबरी

    रुपे तुझी किती त्रिपुरसुंदरी

      तूच द्यावी शक्ती

      तूच द्यावी बुध्दी

      तूच द्यावी स्फूर्ती 

      ताराया भवसागरी

     दूर होवो अंधःकार

     प्रकाश पडो सर्वदूर

     दुःख, दारिद्रय, दैन्य दूर

     तव कृपा राहो निरंतरी 

    

      संहारुनी दुष्टांना 

      बळ देई सुष्टांना

    असत्याचा होई चकनाचूर 

  सत्याचा विजय होतसे तुझ्या दरबारी

     सहस्त्र नामें तुझी

     सहस्त्र रुपे तुझी

   घननीळाची लक्ष्मी तू गोजिरी

    घरोघरीच्या स्त्री शक्तीतूनी 

      प्रगटतेस तू साजिरी 

   मृदुला मुकुंद पाटखेडकर.

ये गं अंबे मजला तारुनी ने गं

ये गं अंबे मजला तारुनी ने गं

   पैंजणादि रुणझुण नाचत ये गं

  माहुरगडची रेणुका तू कुलस्वामिनी 

  आदिमाया आदिशक्ती जगतजननी

  मायारुपी चराचरी, शक्तिरुपी चराचरी

    शक्तीरुपा ये गं....शक्तीरुपा ये गं....

   

   ये गं अंबे मजला तारुनी ने गं

   पैंजणादि रुणझुण नाचत ये गं

   तुळजाई तुळजापूरची तू भवानी

  शिवराय शौर्याची साक्ष जय भवानी

   उदोउदो जयघोष चैतन्य अवनी

   पराक्रम चराचरी, शौर्यरुप चराचरी

    शौर्यरुपा ये गं...शौर्यरुपा ये गं

   

   ये गं अंबे मजला तारुनी ने गं

   पैंजणादि रुणझुण नाचत ये गं

   महालक्ष्मी अंबा माय कोल्हापूरची

   अलंकार शृंगारिक मूर्ती दिव्यतेची

   धनधान्य समृध्दी देवी संपन्नतेची

   समृध्दी सर्वा प्रसन्नतेची दे गं

   ये गं अंबे मजला तारुनी ने गं

   पैंजणादि रुणझुण नाचत ये गं

   

   सप्तश्रुंग गडाची वाट अवघड घाटाची

   जणू आयुष्याची वाट कठीण वळणाची

   सप्तश्रुंगी देवीची मूर्ती अठरा हातांची

   दैवी सौंदर्य लावण्य तेजाळ मुखड्याची

   विश्वमार्ग विश्वाचा तेजाळित ये गं

   

   ये गं अंबे मजला तारुनी ने गं

   पैंजणादि रुणझुण नाचत ये गं

   मृदुला मुकुंद पाटखेडकर.

     २ अॉक्टोबर २०१९.