नाहीस तू....तरीही...

नाहीस तू

तरीही आहेस तू

 

माझ्या देहात

माझ्या रक्तात

माझ्या अस्तित्वात

खुणा तुझ्या

 

नाहीस तू

तरीही आहेस तू

 

पावलांत माझ्या

तुझ्या पाऊलवाटा

स्वभावात माझ्या

तुझ्या रागरंग छटा

 

नाहीस तू

तरीही आहेस तू

 

वाणीत माझ्या

तुझे संस्कारी बोल

वागण्यात माझ्या

तुझे अनुभवाचे बोल

 

नाहीस तू

तरीही आहेस तू

 

गत क्षणांवर तुझीच पडे छाप

आभाळमायेचे तुझ्या

कसे ठरवू मोजमाप??

बाकी भेटतील सर्व नाती

आयुष्यात फक्त एकदाच

मिळत असतो बाप

 

नाहीस तू

तरीही आहेस तू

 

माझी ओळख

तुझं नाव

माझी वसाहत

तुझं गाव

ठायी ठायी मम जीवनी

तुझं निशाण, तुझा ठाव

 

नाहीस तू

तरीही आहेस तू

 

नाते हे जगावेगळे

बाप आणि लेकीचे

दूर राहूनही जपावे

प्रेम असे निर्विवाद

जिथे जाईल तिथे बाबा

पाठीशी आहेच तुझा आशिर्वाद

 

जिथे जाईल तिथे बाबा

पाठीशी आहेच तुझा आशिर्वाद

 

नाहीस तू

तरीही आहेस तू

 नाहीस तू

तरीही आहेस तू

 

मृदुला मुकुंद पाटखेडकर.

२७ नोव्हेंबर २०१७.

मार्गशीर्ष शु. अष्टमी. बाबांची तिथी.