दिवाळी भाऊबीज

   आज बहिणीची माया भाऊरायासाठी

   आज भावाला वाटे ओढ बहिणीसाठी

 

     अक्षवानाचा थाट असते दिवाळी

    ओवाळण्याची हौस असते दिवाळी

  बहीण भावाच्या प्रेमाची साक्ष दिवाळी

   भाऊ जाती बहिणीला भेटण्यासाठी

 

   आज बहिणीची माया भाऊरायासाठी

   आज भावाला वाटे ओढ बहिणीसाठी

 

        नको कोणती वस्तू

        नको कोणती साडी

       नको कोणता दागिना

        नको कोणती भेट

   भाऊराया, तू यावा, तू दिसावा आनंदी

        तुझी व्हावी भेट

     हीच खरी 'भेट' माझ्यासाठी

 

    आज बहिणीची माया भाऊरायासाठी

    आज भावाला वाटे ओढ बहिणीसाठी

 

      ऋणानुबंधाच्या अपुल्या गाठी

     ओवाळण्या मन आतुर तुजसाठी

        आकाशाकडे नयन आतुर

        चन्द्राच्याही भेटीसाठी

       

    आज बहिणीची माया भाऊरायासाठी

   आज भावाला वाटे ओढ बहिणीसाठी

    

         कीर्ती तुझी व्हावी

       हवी ती इच्छा तुझी पूर्ण व्हावी

      सुख, समृध्दी, आरोग्य, ज्ञानाने

  भाऊराया, तुझी जीवन पणती प्रकाशावी

    जीवनज्योत बहरावी, मोहरावी

      जीवनात तुझ्या या सदैव

     आनंद, ऐश्वर्य कारंजी बरसावी

     हीच मोठ्या बहिणीची शुभेच्छा

      अंतःकरणातून भाऊरायासाठी

 

   आज बहिणीची माया भाऊरायासाठी

   आज भावाला वाटे ओढ बहिणीसाठी

 

   मृदुला मुकुंद पाटखेडकर.