तेजःपुंज

मनाचे कवाड उघड ना नीट

समोर दिसतो ना सूर्य? 

घे त्याचे तेज पिऊन

आपोआप स्वच्छ होईल सर्व 

अंतरात्म्यात जळमटे किती?

काढून टाक ना आता!

किती दिवस साचून साचून ठेवतेस - फेक कच-याची कुंडी आता!

सूर्य प्रकाशाने उजळले मन की दिवस होतो ना तेजस्वी

'मुंगी उडाली आकाशी l

तिने गिळिले सूर्याशी' l 

मुक्ताबाईची तुला येऊ दे ना प्रचिती ! 

काय झाली असेल या आध्यात्मिक अनुभवाने 

मुक्ताबाईची अवस्था? 

करत जा ना थोडा विचार! 

किती ठेवतेस नेहमीचीच दूरवस्था! 

अमृत घे ना पिऊन l  दिसते ना तुला सर्वत्र

पाण्यानेच नको पोट भरुस l

घे सारे काही यत्र-तत्र, इतरत्र

दिले आहे कितीतरी दान l 

भरुन घे ना झोळी

आतातरी खडबडून जागी हो

करु नकोस आयुष्याची होळी

ऋग्वेद, यजुर्वेद, सामवेद, अथर्ववेद l नुसतीच नावे नको घेऊस

कर त्यांचा अभ्यास- घे निदिध्यास, खोल ठसव मनात

'आत्म्याचे अनुसंधान' - याचा किती घेतला शोध ऋषीमुनींनी!  

तुझा आत्मा का तडफडत नाही? येऊ दे ना आतातरी भान

नुसतीच पाहतेस.......विचारांचा ठावठिकाणा काहीच नाही

दृष्टी कर ना अलौकिक l 

नुसताच पाहू नकोस सूर्य आणि त्याचा प्रकाश

लख्ख होऊ दे तुझे मन

आकाश उजळून टाक झकास

अति लख्ख चैतन्य......

उजळून टाक विश्व

एकच नाही ना सूर्य ! अनंत ग्रहगोल......फाकतच जाते दृष्टी 

चैतन्याच्या ध्यासाने, उदार होऊन कधी करणार मनमोकळी वृष्टी

कर वर्षाव चैतन्याचा

हो चैतन्य 

उजळून टाक सर्व सृष्टी 

    संगीता पाटखेडकर.