ज्योत से ज्योत जगाते चलो

ठेका चुकला आयुष्याचा 

ठोकाही गडबडला l

तोल नाही राहिला, तालही ढासळला l

टाळ, चिपळ्या, मृदंगाचा ध्वनी  कानी आला l

विराण आयुष्याला उत्तररंग गवसला l

उत्तररंग गवसता आकाश झाले निळे l

ढग दूरवर पांगले, आयुष्य झाले सावळे l

सावळ्याच्या ध्यासाने चित्त स्थिरावले l

सगळे किल्मिष नष्ट झाले

पियूषच राहिले l

अमृताची प्यास संपेना l

चित्ताचा ध्यास संपेना  l

संपायचे ते संपले l

साधियेले ते तेजच झाले l

तेजाचा ओजस्वीपणा l ओळखीचा वाटला l

'ज्योत से ज्योत जगाते चलो'

मंत्र आठवला l

आठवता-आठवता खूपच काही आठवले l

आळवता आळवता रंगात रंगून गेले l

कुठून आले, कुठवर आले शोध फारच लांबला l

लांबवता लांबवता खूपच ताणला l

अती ताणू नकोस - तुटेल l

जे साधले तेही निसटेल l

निसटून चालेल का? l

कर जोड त्याला l

नमस्काराने स्वाधीन कर त्याला l

         संगीता पाटखेडकर.